جروح العدا لو كان تنزف دماها
فلابد ما تضمد مع الوقت وتطيب

والى وصلت أهمومك إلى منتهاها
وصارت جروحك كل أبوها معاطيب

ترى اسبابها جرح القريب وعناها
وشيب المفارق قبل يمشط بها الشيب

بعاد البشر ماأحد يتوقع وفاها
وهم للخوي خويا وعزوه وأصاحيب

ليا جيتها يا سعدها يا هناها
رجال ٍ كرام تباشرك بالتراحيب

وهم عزوة المظيوم واللي نخاها
وفي قدرهم حشمه وطيب ٍ على طيب

معاريفها ماعاد يلحق مداها
والى من طلبت لشورها حق ومصيب

انا افخر بخوة مثلهم وآتباها
رجالٍ تعرف أحقوقها والمواجيب

وبعض البشر سقم العيون وعماها
وعيا يفيد بها الدوى والتطابيب

لها طبع واحد ماتخلي رداها
ومنهاجها تلقى به الشك والريب

مايعرف لها ياكود منهو نصاها
ويكفيك عن كثر الكلام التجاريب

الشاعر/ عبدالله بن منجيه الشمراني
ابوراكان